• 實媒體 Pragmatic Media

【我行我素】 | 彈出又彈入嘅Flexitarian

已更新:2020年4月8日



呢個新專欄叫我行我素,旅行、素食兩樣都唔係做得最專,但我行我素希望分享我少少嘅見解:)

我係Flexitarian,有人譯做「彈性素食主義」,有啲人覺得係僞素食者、僞善、左膠;但我只係希望由飲食習慣開始connect返地球。一直都知道畜牧業係而家氣候變化嘅最大元兇之一,但一直唔自律做唔到素食者,最多只會食少啲牛羊用雞肉魚肉取代去減碳排放。

大概由「想食多啲素但好煩好想食肉唯有食少啲牛羊」嘅間中食素到真正逐步由每個星期有三餐素(淨係計午餐同晚餐)最後變成每個禮拜淨係最多食三餐肉嘅轉捩點係亞馬遜大火。我係成功被guilt trip到——巴西牛肉畜牧業最大出口地去竟然係半個地球以外嘅香港,香港嘅肉食者係親手毀滅緊亞馬遜森林、呢啲森林係爲咗香港嘅肉食者而燒。先唔計運送成本同燒咗嘅森林,牛本來就碳排放量超高,係雞嘅接近4倍。

我曾經聽過有個講法,素食係個spectrum,有人係全素、唔食肉、蛋奶製品,亦都有人由green monday 開始做起。大家總會食菜嘅,已經喺個spectrum入面架啦!我應該處於蛋奶素同green monday之間,總會有想食肉(尤其係雞翼 T^T)嘅時候。我會抑制自己少少,嘗試食少啲肉食多啲菜管好自己。對於一個鍾意食肉(雞翼!!!)嘅人嚟講,呢個自律真係好重要,容許自己有cheat day而盡力做得最多。

一直以嚟我都有個目標,就係唔會因爲自己做少少無用所以唔做,因爲做少少總比唔做好。當唔係咁大犧牲嘅時候點解唔做?地球需要你;)There is no Planet B.





35 次瀏覽0 則留言