• 實媒體 Pragmatic Media

孩子討論政治時事,家長應否避而不談?|葵倩鈴



讀者Q係九歲細路女嘅媽媽,佢同佢老公一直留意社會運動,食飯時都會傾下。但每次打開電視都有啲擔心,因為小朋友對新聞都好好奇,特別係教協宣布全港罷課之後,佢個女就成日問啲關於政治同富爭議性嘅問題。

身為媽媽,佢覺得小朋友唔好咁快接觸政治,所以佢避而不談,話細路女唔識呢啲嘢嫁啦,而佢老公亦會配合,即時轉台,或者塞部IPad叫佢睇返YouTube。

佢同我講,話好怕個女返到學校會同同學傾,九歲三年班,其他同學仔都係一知半解。其實大家都唔知頭唔知路,擔心被其他家長投訴個女教壞人就唔好。

我問佢,「咁間小學嘅家長群組有無人share新聞?」

讀者Q答:「有啊,咪罷課嗰陣囉。個Group好熱鬧,但大部分都係覺得搞到社會好亂,小朋友無得返學,又要安排人接送好麻煩。同埋部分家長都話唔應該令小朋友牽涉入政治當中,擔心佢地,所以都建議我地唔好係小朋友面前講太多。」

其實唔只打開電視睇新聞,出街行過連儂牆、坐港鐵出入閘機、行街收到Airdrop文宣,總之係香港生活的話,都難以避免接觸政治。如果小朋友對時事感興趣,充滿好奇心,其實家長唔需要太擔心。因為當大人睇新聞、傾計時,小朋友自然會觀察,除非你蒙佢眼蓋佢耳,否則你無辦法阻止佢接觸時事,而且你更應該培養佢睇新聞嘅習慣,令佢明白公民權利同責任。

當小朋友想知道發生咩事,其實家長有必要盡量滿足佢地嘅好奇心,解答佢地嘅問題,分享你地嘅睇法,教導佢地多角度思考,小朋友先唔會因為一知半解而出現扭曲嘅社會觀念。至於講到幾深入,自然取決於小朋友嘅年齡、思想同認知能力。

另外,應唔應該帶小朋友上街?我覺得好睇佢本身知唔知發生緊咩事,同埋佢自己嘅意願。安全好重要,如果同小朋友一齊參與社會運動,當然要先判斷佢嘅身心適唔適合。

孩子就係社會嘅未來,亦係社會嘅一份子,當然有權知道社會發生緊咩事。好多事從來都係太遲認知先產生誤會,好似性教育咁。次次都避談,小朋友唔會因而抑止好奇心,反而會使用其他偏門途徑搵答案,更影響佢點理解同消化件事。當大人同小朋友分享時,盡量保持客觀同留意語氣、態度、聲調,用心解答佢嘅疑惑,鼓勵佢表達自己想法,同佢一齊分析,咁先至真正做到唔洗擔心。

我唔係一個母親,但我係一個九歲小朋友嘅家姐。當我細妹問我政治時事,我會盡量了解佢嘅想法同感受,輔導佢去用生活例子嚟理解社會狀況。我都無能力做到完全中立,始終我一向覺得「絕對中立」係唔存在,但我都希望小朋友可以培養到多角度思考嘅能力。


WRITTEN BY

葵倩鈴


香港小說及專欄作者,畢業於香港大學及倫敦大學學院 | 出版著作:《馴養之丘》、《女生情事宣言》

https://medium.com/@kwaisinling

7 次瀏覽0 則留言