• 實媒體 Pragmatic Media

【外國月亮比較圓|(二)未夠18歲都可以蒲吧?】

已更新:2020年1月14日



記得細細個既時候,成班好朋友話16生日就一定要去機鋪慶祝,18歲就入馬會買張六合彩,呢啲法定年齡一早就已經植入係我地心入面。相信每一個細路都曾經想夠18歲就同班friend去酒吧玩返晚,入到去做啲咩唔緊要,重點係可以堂堂正正行入間bar入面唔驚比人check身份證

不過,如果同你講英國既酒吧bb仔都入得呢?


好多人都知外國既夜晚多數都係冇乜野做,好多岩岩過黎留學冇耐既朋友仔都走黎同我講「喂,夜媽媽好悶wor,又早天黑,啲野又早收」,的確英國既鋪頭除咗食肆之外6點左右就會開始收,星期日仲早,咁係度由細長大既人點打發時間?就係去酒吧坐。


Pub,一個非常英式既單字,一開始係Public House既簡稱,而去到今時今日就已經變成酒吧既代名詞。


我特登走去google到底英國有幾多間pub,截至2018年,全英國總共有47600間,而英國人口只有6644萬人,可見pub係英國人既心目中到底有幾重要。


當然地,酒吧對於佢地黎講唔係淨係飲酒咁簡單,更加似一個社區場所比班鄰居出黎出下水。


我記得我係英國第一份工係係一個小社區既西餐廳入面做,方圓十里應該得我一個華人,以我dse既爛鬼英文水平,基本上頭3個月係我聽唔明佢講乜,佢又聽唔明我講乜,不過好彩我語言天份夠高,兩三個月後基本上就冇乜問題,ok講得太遠:)講返正題先,間餐廳劃開咗兩個部份,一入門口係pub,而另一面就係餐廳,呢種形式亦係英國大部分西餐廳會咁,比d客人等緊位嗰時可以飲住野等,或者唔食飯都可以黎飲野。


嗰時有兩對老夫妻我到依家都仲記得,佢地真係風雨不改日日黎報到。一對會黎到開支白酒,飲唔哂第日再飲,另一對就會坐係bar枱前面飲住啤酒同bartenter吹水。佢地係nice到甚至我地放工都會坐低一齊同佢地飲住傾計,有時我覺得我地餐廳啲八卦佢地仲知得快過入面廚房佬:)後尾既時間,經歷過佢地既生日、結婚周年紀念、孫仔孫女生日,亦係我對英國文化認識既開始。



喂!離哂題添!


講咗咁耐咪姐係餐廳水吧,有細路仔好正常姐,之但係英國既pub真係冇年齡限制啊嘛


其實呢樣野我一路都唔知,直至有一次我同男朋友去pub睇波,見到隔壁枱有個媽媽係度餵緊個bb食野… 認真,當時我嚇咗嚇…

(講真你話你青少年偷雞入我都算啦,咁大架bb車你當啲staff盲架咩)


原來係英國法例訂明,只可以販賣酒精飲品予18歲以上人士,而25歲以下人士購買時需出示身份證明文件。而法例係冇訂明幾歲先可以入酒吧,所以未成年既可以入pub,但唔可以買酒精飲品,成班未夠18歲既係可以一齊去酒吧飲可樂:)

(補充一下,club就真係18歲以上先入得,門口會有大隻實Q逐個check冇得偷雞)


所以下次成家大細一齊去英國玩,有冇打算帶未成年既小朋友去酒吧見識下?hehehe

46 次瀏覽0 則留言