• 實媒體 Pragmatic Media

【外國月亮比較圓|(三)學周董搞個古堡婚禮要幾銀】

已更新:2020年1月15日


話說周杰倫2015年嗰時喺英國york搞咗個世紀婚禮,即時亞洲各個地區嘅女性都開始同男朋友講「我要出國結婚!」男仕們一片哀鴻:)咁啱最近有個朋友結婚,就同大家分享下嚟英國結婚要準備啲咩咩。


嗱,我就唔係好清楚香港結婚簽紙程序係點,不過我就咁聽朋友講就應該英國繁瑣啲,歡迎留言分享下香港同英國嘅程序手續有咩唔同。


首先,假設你係外國人(即係唔係British citizen或者現正唔係拎緊任何英國visa),嚟英國結婚你需要去申請Marriage Visitor Visa。如果你嫁嘅係BC,咁淨係需要你本人拎,但如果雙方都係外國人,就雙方都要拎。而呢個Visa都唔係平,承惠£95(港幣約$962)一個人,所以兩個人多謝$2000銀先。Visa係為期6個月,最早可以喺飛英國前3個月申請,即係假設你預1月1日飛,你最早可以9月30日申請。


正常嚟講6個月就足夠預約到完婚,當然佢亦限制你要呢6個月內搞掂,冇得延期,期間亦唔可以工作或者讀書超過30日。所以結婚visa就真係比你黎結婚。當然中間申請需要啲咩文件呢度就唔討論,有興趣既可以自己上gov.uk 研究。


$2000大銀送出去之後拎到visa,就可以飛過嚟開始搞你既人生大事。首先好重要一樣野,你要決定你嘅婚禮場地,到底你要喺市政局簡簡單單簽紙就算,定係要喺教堂好似周董咁,甚至任何地方,當然𠴱個地方需要有一個合資格既見證人,如果冇就承惠£86(港幣約$871)。


決定咗之後就可以打電話去你個town嘅register office,呢個動作叫「give notice」。無論係男方定女方打過去最好英文要夠好,因為佢哋會問你一大堆問題,包括你嘅個人資料、國籍、打算喺邊度搞婚禮之類,而佢亦需要確認你嘅另一半都識基本英文(至少個見證人問你願唔願意你都要識答我願意嘛,係咪先?)。除此之外亦有第二個原因要識基本英文,原因下面再講,不過見過有case係可以請翻譯,詳情可以係電話嗰時問職員。


去到電話嘅最後,職員會同你約時間去register office interview,係啊結個婚都要面試,而且係雙方都要出席。而呢個日子必須要係你抵達英國嘅7日後,如果你或者其中一方係外國人的話,需要約指定地點既office(designated register office),詳細地點都係參考返gov.uk


約好咗時間之後,佢會同你confirm你要帶嘅文件同埋收錢,冇睇錯又收錢啦哈哈哈,如果你係BC承惠£35(港幣約$354),而你唔係的話就多謝你£47(港幣約$476),最最最重要一樣嘢,佢係按人頭收費,所以麻煩將個價錢x2。(寫到呢度,我一路都好想吐嘈,佢按人頭收費咁係咪代表有可能唔係2個人結婚?)


嚟到呢度,恭喜你已經比哂最基本洗費,即係無論你要簡單簽紙定搞世紀婚禮上面呢堆野你都係要比。小總結一下,假設雙方都係香港人,你都只係比咗…£284(未計機票同見證人),比起香港簽紙$305,都係差個零左右姐…


到咗give notice當日,就要同你另一半一齊準時去到約好嘅地點,記得一定要準時,最好早15分鐘,因為遲到佢又可以收你幾廿鎊改時間。常言英國交通瀨屎好正常,所以早啲到喺隔離costa飲杯咖啡好過。


等一陣面試官就會叫雙方一齊入去,各自收文件之後就會叫男方出去等,因為佢要分開interview你兩個!唔知係咪為咗杜絕假結婚,所以先有呢個政策,雙方會各自同面試官獨處5分鐘,佢會問好多你同你另一半嘅個人問題,包括對方嘅名、生日、地址、工作、屋企人都有可能問,咁當然如果你兩個真係拍拖既話,係唔會難到你地嘅。而呢個亦係點解我上面話需要基本英文能力,唔係就雞同鴨講。


(題外話,因為結婚證書上面會寫你當時既職業,而我朋友當時正想轉行,所以佢臨時決定話自己無業,而佢出去交換既時候不經意咁同未婚夫用廣東話提佢呢件事:)當然誠實是美德,唔鼓勵亦唔提倡。)


問完之後佢就會叫返另一位入黎,同你一齊討論婚禮地點。男仕們,呢個係阻止世紀婚禮嘅最後機會,因為定好咗就冇得改!當然你真係要改既可以,由give notice開始再做過,再比多次錢咁你就可以由世紀教堂改為喺酒店隔離公園bbq啦。


搞掂哂呢埋野,英國法例係會將你兩個嘅個人資料同相係office張貼,睇有冇人反對,如果冇人反對就可以係29日後舉行婚禮。(阿牛,係時候到你出場,講笑姐)


由你收到一封准許你地結婚嘅信開始,你哋就可以打去當日你哋決定咗嘅場地book期。法例係需要喺give notice後12個月內舉行婚禮,而你哋拎住visa就要係到期前搞掂。


我朋友當時係選擇簡簡單單簽紙就算,所以佢book咗最近自己屋企register office最平嘅場地,場地費只需£59(港幣約$598),連同新人只可以容納6個人,即係新人加2個證婚人,亦只係請咗兩位朋友參加。


我好奇搵咗當日周董喺york嘅selby abby搞到底洗咗幾多錢,2017年該教堂租場價無£466(港幣約$4,732),而其他額外費用包括管風琴手£118(港幣約$1,196),合唱團£120(港幣約$1,216),授權錄影£168(港幣約$1,702)(係啊,錄影crew你要另外再比錢搵),響鐘£160(港幣約$1,621),每個花盤£80(港幣約$810)(冇睇錯真係逐個盤同你計錢而且佢只包盤唔包花)。


當然無論你大搞定細搞,都需要兩名18歲以上既證婚人,佢哋係會簽埋你張證書,所以請慎選。

(小小小題外話,朋友結婚既時候係6月之前,當日搵咗位另一面顏色既證婚人,佢表示後悔終身中…)


同埋順帶一提,英國結婚證書仲保留住有父親資料嘅傳統,即係會寫埋雙方父親嘅名同職業喺上面,咁媽媽呢…… :(


搞掂哂以上呢堆野,恭喜獲得道具,手寫英國結婚證書一張!


總結計下數,其實呢家野都係大有大搞,細有細搞,朋友成件事埋單都唔洗2000銀港紙,但一樣結得開開心心。今次比個參考各位,女仕們歡迎收藏,男仕們亦歡迎收藏,收藏唔好比女朋友見到啊:)


順帶一提,英國係接受同性婚姻(civil partnership),流程同上,有需要既人可以參考下唔去台灣去英國搞。


**************


後話:話說點解朋友咁平搞掂成件事,首先男方本身係英國做野,所以唔洗拎marriage個visa,而女方一開始只係旅行過黎,但係男朋友一個唔小心就求咗婚,又一個唔小心決定係臨走前簽埋張紙佢。


咁你一定會問,我打第一段咪姐係廢up?都唔係嘅十,如果你冇呢個visa,give notice之後就需要等最多90日(而唔係本身正常程序既28日),而90日內home office會調查你嘅身家背景,然後寄封信比你通知可唔可以結婚。咁你諗下你要花多咁多時間,而且正常香港人都係得180日visa free entry,一個唔小心查足你90日之後book期又冇位既話都幾係野,所以visa嗰2000銀就自己諗諗抵唔抵啦。(不過最後朋友係兩個星期後收到信,home office話唔查佢,所以都係照返28日。但係頭盔mode:個人經歷不代表本報立場)


Btw 保障朋友私隱,今次冇圖:)

112 次瀏覽0 則留言