• 實媒體 Pragmatic Media

【#黃色經濟圈 | 一起果醬】


近來同朋友傾開,到底有邊啲黃店係好食既呢?大家都唔係好講得出,但不約而同咁講起一個名:一起果醬。咁究竟一起果醬到底有幾好食呢?我哋就搵左兩位小編,分開唔同時段,唔同舖頭,去試試佢。


裝潢

首先講下西貢分店先,呢間一起果醬既裝修大多數都俾連儂牆覆蓋住,一張一張memo已經代表住呢間舖頭係黃店。而位於西貢既呢間分店面積比較少,同時亦比較少座位,感覺同西貢附近既咖啡店差不多,都係有種懶洋洋,假日的感覺。同時間,亦都有自助連儂牆的位置,歡迎食客填寫連儂牆。


而另外一間小編有去既一起果醬分店,就係尖沙咀分店。同西貢分店一樣,尖沙咀分店由舖面至到舖內既牆身都係貼滿連儂牆,亦都有自助連儂牆,食客可以寫自己想講既說話。但比起西貢分店,尖沙咀呢間空間感會大一點,同時間,氣氛亦會似一般西餐廳一樣,燈光比較暗,有感覺一點。

食物質素

主菜係龍蝦汁海鮮意大利飯,上菜一刻已經覺得它外觀吸引,所以一開始就充滿期待。食第一啖飯嗰陣,我覺得佢係典型飯質偏硬的意大利飯,奶油味比龍蝦汁味更重,佢嘅配料有細青口、魷魚、帶子同蝦,以一道海鮮意大利飯嚟講,雖然佢嘅分量係適合一般女性嘅胃口,但同時佢嘅味道係略嫌普通,僅屬正常發揮,唔會令人一試難忘,而且美中不足嘅係蝦煮過頭,蝦殼唔易同蝦身分離,食嘅時候難免有啲麻煩。


小食講下薯角配士多啤梨燒烤汁先。薯角口感就外脆內綿,食落去口感比普通餐廳好,味道雖然稱唔上一百分但係至少值七十,如果配搭士多啤梨燒烤汁一起食就完全值九十分。


依款小食嘅主角其實係士多啤梨燒烤汁,個汁入口第一啖就酸酸甜甜幾開胃,隨之而來係微微嘅辣,配上薯角食落都幾特別,酸甜得黎又唔會膩,反而微微嘅辣會令人上癮,想不停食多啲。


其次係玫瑰蘋果醬單骨雞翼。雞翼炸得幾香,係枱上面就聞到佢淡淡嘅蜜糖(?)香味。口感就同一般炸雞翼差唔多,不過不失。味道方面就比較突出,入口係淡淡嘅蜜糖甜味仲有小小蘋果醬嘅香味,兩種味都幾夾,喜歡食甜味雞翼(蜜糖、可樂雞翼)嘅不妨試下。


而甜品方面,一起果醬主打既當然就係果醬,呢度既果醬係自家製,標榜無添加,同時亦有唔同特別既口味,配合唔同既菜式。


九宮格果醬多士:果醬係自家無添加手工製,9款裏面我大概只食咗2-3隻味,而我比較記憶猶新嘅係玫瑰味同埋柚子味 ,粒粒果肉+醬汁,配上外脆內軟嘅多士,味道甜而不膩,其他味道就唔算太特別。


果醬雪糕窩夫餅:窩夫外脆內鬆軟 ,因為整體都算幾大件,3-4人食,每人一小份,作為飯後甜品,食落剛剛好飽肚。果醬方面叫咗桂花雪梨,味道清淡香甜,唔會過於搶咗窩夫原本嘅味道



飲品分別叫咗桂花雪梨/玫瑰蘋果&雜莓醬嘅果醬沙冰。

桂花雪梨醬沙冰味道比起玫瑰蘋果偏甜咗少少,桂花有陣淡淡嘅清香味,喝下滋潤喉嚨。

玫瑰蘋果醬一入口有蘋果嘅微酸味,但唔會太搶咗玫瑰嘅香甜味,剛好中和咗。

雜莓醬則酸中帶甜,亦十分消暑開胃。


另外,小編當日正正係台灣大選,當蔡英文宣布勝出既時候,店員為每一枱既食客擺上一碟免費的多士,碟上用朱古力醬寫上小英同埋畫上一個心心,代表一起果醬對蔡英文勝出既喜悅。


總結,一起果醬係味道方面係黃店水平黎講的確一絕,特別係甜品,佢哋既自家無添加手工製果醬的確不錯,而且仲啖啖果肉,而且配合唔同菜既菜式,令每樣食物既口感都增添新元素。但並非每款果醬既味道都好吃,如果需要改進既話,呢個會係一個方向。可能呢間係的確有點貴,但佢既價錢同其他同類型既餐廳比較,的確相差不遠。


係準備埋單既時候,小編都有同店員傾下計,問及關於香港仔分店準備開幕,店員就對於頂替富臨旗下的龍門冰室鋪位,一起果醬上下都表示興奮亦都非常開心,但同時亦感覺難做,因為鋪面達1000多呎,所以未必有足夠人手應付,因此會招聘更多人手應付樓面,同時亦會請比較有經驗的人手,而手足亦會聘請。特別既係,由於香港仔店舖本身為冰室牌照,所以一起果醬將會喺香港仔鋪頭轉為一起果醬冰室。小編對於呢個消息感到期待,到底一起果醬做冰室會係點既呢?我哋一齊拭目以待。

145 次瀏覽0 則留言